monumenta.ch > Hieronymus > bnf9389.428 > sectio 8 > SI PER OFFICIUM AGANTUR. > XVI. SALVENTIO V̅. · I̅ · PRAEFECTO URBIS ATHALARICUS REX. (a. 533 fin.) > sectio 12 > XIIII. FORMULA COMITIVAE RAVENNATIS. > sectio 9 > XXVIII. FORMULA PRINCIPIBUS MILITUM COMITIVAE S(UPRA) S(CRIPTAE). > X. FORMULA QUA PER CODICILLOS VACANTES PROCERES FIANT. > sectio 35 > csg456.373 > bnf2630.722 > sectio 8 > bnfGrec107.255 > csg75.715 > uwbM.p.th.f.68.190 > csg456.48 > sectio 15 > csg456.107 > XVIIII. SENATUI URBIS ROMAE ATHALARICUS REX. (c. a. 533)
Cassiodorus, Variae, LIBER NONUS, , XVIII. EDICTUM. ATHALARICUS REX. (a 533/534) <<< >>> XX. AD UNIVERSOS IUDICES PROVINCIARUM ATHALARICUS REX. (c. a. 533)
Cassiodorus, Variae, LIBER NONUS, XVIIII. SENATUI URBIS ROMAE ATHALARICUS REX. (c. a. 533)
1 Laudabilium iussionum causas plerumque praebet vituperabilis excessus alienus et miro modo momenta iustitiae de iniquitatis occasione nascuntur.2 silet enim aequitas, si culpa non vociferetur admissa et feriatum quiescit principis ingenium, quod non fuerit aliqua querella provocatum.3 Conquerentium siquidem vocibus adacti et frequentium populorum de rebus quibusdam interpellatione commoniti necessaria quaedam Romanae quieti edictali programmate duodecim capitibus, sicut ius civile legitur institutum, in aevum servanda conscripsimus, quae custodita residuum ius non debilitare, sed potius corroborare videantur.4 Haec in coetus vestri splendore recitentur et per triginta dies praefectus urbis locis celeberrimis faciat sollemni more proponi, ut nostra civilitate recognita spes truculentis moribus auferatur.5 nam qua confidentia protervus assumat quod principis agnoverit damnasse clementiam? redeat amor omnibus disciplinae, per quam et parva coalescunt et potiora servantur.6 Ideo enim exercitus nostros iuvante deo crebris expeditionibus commovemus, ut universitatem compositam vivere legibus sentiamus.7 reddatur haec animo nostro vicissitudo praemiorum, ut, quem rei publicae utilitatibus cognoscitis occupatum, rarissima querellarum aditione pulsetur.8 teneant iudices legitimas districtiones: votum foedissimae venalitatis abiciant.9 metus cuncta componit, si reus crimen in iudicante non invenit.
Cassiodorus HOME